寫文拯救C

大學期間，有時你哋可能會因為上莊、Ocamp、演出、社團活動、學術研究或者比賽等原因需要尋求贊助。以下列出喺尋求贊助時應該注意嘅幾點。

1. 事先規畫

為了令贊助商了解你哋嘅需求同相信提供贊助嘅價值，可以準備以下嘅資料：

• 活動或項目簡介：詳細說明活動的目標、時間和地點以及對象等。信息越具體，贊助商就越容易理解你哋的需求。
• 預算表：列出預計嘅支出，例如場地租金、器材費用、宣傳費等，並註明需求贊助嘅具體金額或物資。
• 給予對方嘅回報：具體說明贊助商可以獲得嘅回報，例如品牌曝光、媒體報導、活動現場的宣傳機會等。
• 過往合作：列出以往相關活動嘅成功例子會增加你提案的可信度。

同時，如果校方對索取贊助有指引，亦應遵守相關嘅規定。

2.給予對方合理的回報
索取贊助時亦應要考慮對方利益，確保佢哋喺贊助你嘅同時都能夠得到合適嘅回報。如果你嘅活動涉及義工或慈善性質，可以詳加描述並解釋點樣可以回饋社會；但如果只係自己人嘅內部活動（例如 O Camp 或者就職典禮）要求對方贊助幾千蚊，但給出嘅回報只係印上商標鳴謝，對方贊助嘅誘因亦不高。

你可以考慮給予嘅回報包括：

• 商標及鳴謝：可以為佢地擺放傳單、宣傳資料上展示佢哋嘅商標及公司名字、場刊上面落廣告等；亦可以讀出佢地嘅廣告。
• 現場活動：例如設立贊助商嘅攤位，讓佢哋可以直接接觸活動參加者。
• 社交媒體宣傳：喺社交媒體平台上標註贊助商，並發佈感謝帖文。你亦可以提出由莊員Follow 對方嘅Instagram，或與贊助物品拍照列為條件。

3.適當的態度

洽談贊助時，你係代表住自己嘅學校、學科以及自己支莊。因此，請確保自己嘅言行舉止恰當，並記住贊助並唔係必然。無論對方最終會唔會提供贊助，都要表達你嘅感激，因為他們花時間考慮你嘅提議。

活動或項目結束後，可以給贊助商發送感謝信，並報告活動成果。如果活動係對公眾開放嘅，例如音樂演出、市集、藝術展覽等，亦可以邀請對方出席。咁樣不僅能夠鞏固關係，也為未來嘅合作打下基礎。

4.尋找可靠嘅贊助商

• 可以詢問上莊或者其他學會，以了解贊助商嘅背景同信譽。你亦可從過往嘅贊助小冊子／宣傳品中找出公司列表。如果過往曾提供贊助，繼續提供贊助嘅成功率亦相對高。
• 可以漁翁撒網地問，但請先了解對方嘅行業或服務性質。例如，過往有同學仔問寵物食品店贊助食物，或者向殯儀從業員索取贊助，其後放上網被貽笑大方。
• 應參考網上評價，確保選擇嘅贊助商係可靠嘅。
• 建議訂立合約，保障雙方嘅利益，免除不必要嘅糾紛。
• 仔細衡量對方提出嘅條件。有部分贊助商會在贊助時要求學生購買其貨品，或者「跑數」開信用卡等等，並在無法履行時需要罰款。有疑問應及早澄清如果你認為你無法達成對方開出嘅條件嘅，可事先與對方協商，完全唔合理嘅就唔好應承。
• 警惕過分好嘅承諾：如果對方嘅條件好到令人難以置信，應該小心，可能存在騙局嘅風險。

5.完整地執行協議
講過要做到嘅事情一定要算數。一旦獲得贊助，就要按承諾履行對贊助商嘅回報，無論係商標及鳴謝、活動現場宣傳或者其他形式，都要依時履行。如果對宣傳資料、贊助商標誌嘅展示方式或者其他事項有任何變更，應及時同贊助商商量並達成共識。萬一簽約／確認合作關係後因為任何原因無法履行，亦應負責任地同對方道歉並商討替代方式，唔可以走數。如果贊助涉及食物或物資，請確保物資能被妥善使用，唔好給予對方或公眾浪費嘅印象。

同時，鳴謝或展示對方商標前，建議先與對方核對公司全名以及商標嘅正確使用方式，並確保唔好忘記加漏任何人嘅 Credit，講錯名或者數漏人名就有可能令對方不快。

6.應及早準備
給予對方足夠時間討論，唔好臨急抱佛腳，令贊助商有足夠時間考慮你嘅提案同作出決定。如果活動或者項目有確定嘅進度表，一定要嚴格按照時間表進行，讓贊助商知道你係嚴肅對待呢個活動。

尋求贊助係一項需要策略同心思嘅活動。希望各位同學都可以順利搵到贊助，成功舉辦你哋嘅活動或者完成項目！